चार्ल्स कार्नवालिस, फस्ट मार्केश कार्नवालिस (Charles Cornwallis, 1st Marquess Cornwallis; 31 दिसंबर 1738 – 5 अक्टूबर1805), जिनके लॉर्ड कॉर्नवालिस (Lord Cornwallis) के नाँव से ढेर जानल जाला, ब्रिटिश आर्मी के एगो जनरल आ ब्रिटिश अफसर रहलें। इनका के अमेरिका आ ब्रिटेन में परसिद्धि अमेरिका के आजादी के लड़ाई में ब्रिटिश जनरल के रूप में बा; एकरे बाद ई आयरलैंड आ भारत में सिविल आ मलेटरी अफसर के रूप में काम कइलें। दुनों जगह इनके काम के ब्यापक बदलाव वाला मानल जाला; आयरलैंड में एक्ट ऑफ यूनियन ले अइलें जबकि भारत में कार्नवालिस कोड आ इस्तमरारी बंदोबस्त (परमानेंट सेटलमेंट) खाती इनके परसिद्धि हवे। इनके निधन भारत के उत्तर प्रदेश राज्य के गाजीपुर शहर में भइल; अहिजा इनके सम्मान में एगो इस्मारक बनावल गइल बा।
