सिजिगी

सिजिगी (अंग्रेजी: Syzygy) कौनों गुरुत्वीय सिस्टम में तीन गो आकाशीय पिंड सभ के एक सीध में आ जाए के स्थिति के कहल जाला। एकर सभसे आम उदाहरण चंद्रमा के पृथ्वी के चक्कर लगावत समय सुरुज चंद्रमा आ पृथ्वी तीनों के एक लाइन में आ जाए के बा। हर अमौसा आ पुर्नवासी के सिजिगी के स्थिति होला।

भारतीय पद्धति में एकरा के युति आ वियुति के नाँव से जानल जाला। जब संदर्भ पिंड आ चक्कर लगावे वाला पिंड एकही ओर होलें तब एकरा के युति कहल जाला आ एकरे बिपरीत जब संदर्भ पिंड आ चक्कर लगावे वाला पिंड दुनों बिपरीत दिसा में होलें तब वियुति के दशा होले। उदाहरण खातिर अमौसा के स्थिति के सूर्य आ चंद्रमा के युति कहल जाई, आ पुर्नवासी के इनहन के वियुति के दशा होखी। चूंकि एह दुनों स्थिति में, तीनों पिंड एक सिधाई में होलें, दुनों के सिजिगी कहल जाला। अंग्रेजी में युति के कौन्जुगेशन आ वियुति के अपोजीशन कहल जाला।