ताजा पानी

प्राकृतिक रूप से पावल जाये वाला अइसन पानी जे नुनछाह न होखे खारा न होखे

ताजा पानी, चाहे मीठा पानी भा मीठ पानी, अंग्रेजी में फ़्रेश वाटर (Fresh water) कौनों भी अइसन प्राकृतिक रूप से पावल जाए वाला ठोस बरफ के जमल रूप में चाहे लिक्विड पानी हवे जे नमकीन भा नुनछाह न होखे, मने की जेह में बहुत बेसी मात्रा में नमक आ अउरी ठोस पदार्थ न घुलल होखें। ई नाँव खासतौर से समुंद्री आ खारी झील सभ के खारा पानी आ समुंद्र किनारे के ब्रैकिश वाटर के अलगा करे खातिर हवे, एह में कुछ खनिज से भरपूर पानी सामिल कइल जाला जे नुनछाह न होखे। ई ताजा पानी चाहे फ्रेशवाटर पृथिवी के दुनो ध्रुव आ ऊँचाई पर जमल बरफ के चद्दर के रूप में हो सके ला, ग्लेशियर आ ग्लेशियर के पघिलाव से बने वाला पानी हो सके ला, प्राकृतिक रूप से बरखा के पानी, बरफबारी के पघिलाव से निकलल पानी हो सके ला चाहे जमीन के ऊपर नदी, झील, ताल, तालाब, इनार वगैरह में एकट्ठा पानी हो सके ला, जमीन के भीतर पावल जाए वाला जमीनभीतरी पानी (ग्राउंडवाटर) हो सके ला।

जिंदा जीवधारी सभ, मनुष्य से ले के जिया जंतु आ बनस्पति सभ ले, सभका के पानी पर निर्भरता होखे ले। जहाँ कुछ जीवधारी खारा पानी में भी जिंदा रह सके लें, ज्यादातर जीव आ बनस्पति सभ खातिर खारापन के बिना, इहे ताजा पानी के जरूरत होखे ला।

ताजा पानी चाहे मीठा पानी, हमेशा मनुष्य द्वारा पिये लायक पानी (पॉटेबल वाटर) होखे ई जरूरी ना बाटे। पृथ्वी पर मौजूद अइसन ताजा पानी के ज्यादातर हिस्सा अइसन ना बाटे कि हमनी के ओकरा के सीधे बिना कौनों सफाई भा ट्रीटमेंट के पियल जा सके। ताजा पानी कई किसिम के गंदगी के प्रवेश से पिए लायक ना रहि जाला। एही से ताजा पानी भा फ्रेशवाटर के साफ पिए लायक पानी से अलगा बूझे के चाहीं। ई खाली भर खारा पानी से एकरा के अलगा करे खाती इस्तेमाल होखे वाला शब्द हवे।

इहो देखल जाय संपादन करीं

संदर्भ संपादन करीं