महाजनपद

महाजनपद (महा माने बड़ भा बिसाल, जनपद माने पुराना भारतीय जन यानी खास समूह सभ के इलाका; संस्कृत: षोडश महाजनपद) पुराना जमाना में छठईं सदी से चउथी सदी ईसा पूर्ब के समय में, वर्तमान भारतीय उपमहादीप के इलाका में, सोरह गो राज भा गणतंत्र रहलें। इनहन में दू गो के गणतंत्र (मने आज के समय के रिपब्लिक) सभ नियर होखे के अनुमान लगावल गइल बा आ बाकी सगरो राजा के शासन वाला मने कि राजतंत्र बेवस्था वाला राज रहलें।

महाजनपद सभ के लोकेशन देखावत नक्सा

कई बौद्ध ग्रंथ सभ में इनहन के बहुधा नाँव आवे ला आ ई बुद्ध आ महावीर के कुछ पहिले भा ओह लोग के समय के राजनीतिक बिभाजन रहल। 6वीं–5वीं सदी ईपू के भारतीय इतिहास में एगो मोड़ के बिंदु के रूप में देखल जाला आ सिंधु घाटी सभ्यता के पतन के बाद दोबारा पहिली बेर भारत के इलाका में बड़ शहर सभ के उदै एही काल में भइल मानल जाला।

पुरातत्व के नजरिया से, ई काल 'उत्तरी करिया पालिशदार बर्तन वाली संस्कृति' (नदर्न ब्लैक पॉलिश्ड वेयर कल्चर) के समय हवे।

लिस्ट

बौद्ध ग्रंथ अंगुत्तर निकाय, महावस्तु में जवना सोरह महाजनपद सब के नाँव आइल बा उनहन के लिस्ट नीचे दिहल जात बा:

1. अंग
2. अश्मक (भा अस्सक)
3. अवंती
4. चेदि
5. गांधार
6. काशी
7. कांबोज
8. कोसल
9. कुरु
10. मगध
11. मल्ल
12. मत्स्य (भा मछ)
13. पांचाल
14. शूरसेन (भा सूरसेन)
15. वज्जि
16. वत्स (भा वंश)

इहो देखल जाय

• सिंधु घाटी सभ्यता
• मगध राज
• मौर्य साम्राज्य