महीना

महीना भा महिन्ना (अंग्रेजी: Month) समय के नापे के एगो इकाई हवे जे साल से छोट होला आ हप्ता भा पाख से बड़ होला। जादेतर कैलेंडर सभ में एक साल के बारह हिस्सा में बाँटल जाला आ इनहन के महीना कहल जाला। एक चंद्रमा के गती से संबंध हवे आ एक पुर्नवासी से अगिला पुर्नवासी के समय के महीना मानल जाला। फ़ारसी में माह माने चंद्रमा होला आ संस्कृत के पुरान रूप चन्द्रमस से मास भा माह निकसल हवे, एही से चंद्रमा के एक चक्कर के माह, महीना, मास नाँव दिहल गइल बा।

भोजपुरी क्षेत्र में हिंदू पतरा के हिसाब से महीनन के नाँव के चलन बाटे जे क्रम से चइत, बइसाख, जेठ, असाढ़, सावन, भादो, कुआर, कातिक, अगहन, पूस, माघ, आ फागुन बाड़ें। संस्कृत में इनहन के एही क्रम से नाँव होला एक वर्ष में बारह गो महिना होला। चैत्र, वैशाख, ज्येष्ठ, आषाढ़, श्रावण, भाद्रपद, आश्विन, कार्तिक, मार्गशिष भा अग्रहायण, पौष, माघ, आ फाल्गुन

इंटरनेशनल रूप से चलनसार ग्रेगोरियन कलेंडर के बारह महीना सभ जनवरी, फरवरी, मार्च, अप्रैल, मई, जून, जुलाई, अगस्त, सितंबर, अक्टूबर, नवंबर, आ दिसंबर होलें।